【實習生唔使搭車食飯咩】
有次上朋友工作嘅雜誌社，見到好多實習生喺度update網站新聞，有啲仲孭住部相機出去採訪，我即刻同佢講:「你公司幾好喎，肯俾實習生咁多機會。」點知個朋友答我:「好鬼，老闆話實習生人工平，未請到人咪用住先囉，3500蚊一個月，反正咁多嘢做。」
好多公司打正旗號，話幫學生適應社會工作環境，聽落冠冕堂皇，但背後動機同埋心態係點，相信只有老闆先至知。最近有網友喺求職網站見到一份實習生工作，請Editorial/Photography Interns，講到明冇人工，但可以得到credit。坦白講，好多人窮一生先學識喺工作上嘅技能或者待人接物，難道呢度有速成班，值得免費加盟?
如果係人人都識嘅超級品牌，咁又唔同講法喎，但係cnbc之前出過一篇報道叫做「Here's how much interns will make at companies like Facebook and Google in 2017」，你會發現愈有名嘅公司，係愈唔會諗縮數，睇下以下巨企出幾錢俾實習生:
Amazon USD $7,600 / 月薪
Google USD $6,600 / 月薪
Facebook USD $8,000 / 月薪
「人哋Google同Facebook梗係勁啦，邊有得比?」咪係囉，咁勁嘅品牌俾你入去實習，應該學到唔少嘢啦，但佢哋都會出糧俾實習生喎，除非啲老闆真係覺得自己間公司勁過以上巨企，學嘅嘢多過佢哋好多啦，咁請問有乜理由唔俾錢先?
再同鄰近亞洲地區比較，首爾Samsung嘅實習生每月有$9,887港紙，東京Sony有$9,386港紙，而上海Microsoft就有4,469人仔。
喺HR同埋Recruiter嘅世界，全職工作經驗先係最重要，咁當然你去過Facebook或者Google做實習生，係足以令我哋眼前一亮嘅，但如果你去實習嗰間公司唔係呢種級數，其實都冇乜特別優勢可言，假設嗰份實習仲要冇錢，因而唔係full time形式，可能每星期返兩三日，或者每日幾粒鐘嗰種，咁就更加冇參考價值。
唔係想教大家市儈，只係覺得實習生雖然零經驗，但都要搭車食飯架。
%%鳴謝提供求職網站截圖嘅網友Maxine，unpaid，but can be taken for credit
Search